近排天氣非常舒服，最啱就係行山郊遊，呼吸一吓新鮮空氣啦！但如果你同A姐一樣，行山經驗唔多，而且每次行山都只係為咗打卡影相，咁以下呢10條行山路線就非常適合行山初哥嘅你哋喇！呢10條行山路線輕鬆易行，有得打卡之餘仲唔會太辛苦，兼且可以影相打卡添，一齊睇睇以下A姐M佬嘅行山郊遊推介啦！
提提你
1. 大家記住保持環境清潔，自己垃圾自己帶走，絕對唔可以破壞大自然環境
2. 記住帶備足夠嘅飲用水及補給品前往行山郊遊
3. 以下路線雖然被稱為初級行山郊遊路線，但都要記住量力以為
4. 出發前往行山郊遊記住結伴同遊，並且同其他屋企人或朋友告知大概行程
灣仔：大潭水塘
輕鬆指數：😎😎😎😎（5分為輕鬆無難度 ->1分為攰到嘔）
詳情：石橋水壩打卡全攻略 大潭水塘水務文物徑
位於大潭水塘嘅大潭水務文物徑（又名大潭篤水塘）簡單易行，由紅山半島出發，全程都係落山路段，兼且途經大量歐洲式石橋、超靚水塘同壯觀水壩。大潭水塘喺1888年至1917年間分期落成，包括大潭上水塘、大潭副水塘、大潭中水塘及大潭篤水塘，係香港島食水嘅主要來源。整段路程中，最受大家歡迎就係四座石橋，石橋用花崗石建成，以半圓拱形結構，並以多條巨柱承托，真係好有歐洲feel啊！喺秋冬季嚟仲有紅葉睇；如果大雨過後，仲有機會見到位於終點站嘅大潭篤水塘水壩排洪添！水壩由12條半圓拱形溢洪水道，以花崗石築成石柱。每次大雨之後，雨水就會經溢洪道排出，形成雨季限定瀑布。啱晒大家影相打卡，玩足一日！
山頂：盧吉道環迴步行徑
輕鬆指數：😎😎😎😎😎（5分為輕鬆無難度 ->1分為攰到嘔）
詳情：BB班郊遊徑睇維港靚景 山頂盧吉道環迴步行徑
山頂環迴步行徑已經過百年歷史，其中一段更以香港第十四任總督盧吉爵士命名：盧吉道，當時更有「人工征服自然者之最偉大工程」嘅美譽添！由山頂廣場沿盧吉道行咗大概20分鐘，就會見到呢個聞名中外嘅維多利亞港270度景色，喺觀景台可以睇到無遮擋嘅香港繁華鬧市，可以就啱時間睇埋日出、日落、夜景同雲海，真係隨意撳相機快門掣，都會影到一張張打卡靚相。整條山頂環迴步行徑以平路為主，輕鬆易行，適合推BB車同長者㗎！
九龍城：格仔山
輕鬆指數：😎😎😎（5分為輕鬆無難度 ->1分為攰到嘔）
詳情：尋找啟德機場的遺跡 輕鬆易行兼打卡樂富格仔山
以前喺九龍城，只要抬起頭就可以好近距離見到準備降落或起飛嘅飛機。不過，自從啟德機場搬咗去赤鱲角之後，飛機離開咗，但就仍然保留格仔山。點解山上面會畫上呢啲紅白色嘅格仔圖案呢？原來係為咗帶領機師安全降落被譽為世界上其中一個好危險嘅啟德機場13跑道。其實喺1998年啟德機場關閉之後，格仔山曾塗上灰色，以免誤導機師。直正近期因為斜坡維修工程，而重新塗上紅白格仔。嚟到格仔山觀景台，呢度可以望到九龍城一帶嘅景觀，天氣好仲可以睇到維港對岸添。
慈雲山：鯊魚石
輕鬆指數：😎😎😎😎（5分為輕鬆無難度 ->1分為攰到嘔）
詳情：陸上鯊魚出沒注意 20分鐘輕鬆行鯊魚石
好多奇山名石都要靠七分想像，甚至無限幻想，先至覺得形似，或者最終諗極都唔似！不過，位於慈雲山嘅鯊魚石，真係爆似鯊魚呀！更重要係輕鬆易行，呢條行山郊遊徑20分鐘就到達目的地，打卡一流呀！近睇呢條鯊魚，原來喺石上裂痕放有唔少碎石，勁似鯊魚口同牙齒，記得打卡影相喇！
深水埗：嘉頓山
輕鬆指數：😎😎😎（5分為輕鬆無難度 ->1分為攰到嘔）
詳情：城市之夜景 深水埗嘉頓山
喺香港睇夜景，好多人第一時間都會諗起太平山山頂。但其實除咗維港夜景，香港仲有唔少地方可以睇到好特別嘅夜景架！其中位於深水埗嘅嘉頓山，就因為同民居相近，可以欣賞到震撼嘅萬家燈火夜景喇！呢條嘉頓山行山郊遊徑行15分鐘就到頂，可以睇到深水埗一帶嘅城市夜景！之所以稱為嘉頓山，係因為呢座山位於深水埗嘉頓廠嘅旁邊，呢座山只係90.6米高，有唔少人鍾意喺黃昏時間登山，可以由日落睇到夜景。
將軍澳：小夏威夷徑
輕鬆指數：😎😎😎（5分為輕鬆無難度 ->1分為攰到嘔）
詳情：初級郊遊行山之選 將軍澳小夏威夷徑
小夏威夷徑唔算太長，呢條行山郊遊徑沿路風景一流，仲可以遠眺將軍澳全景，當然最靚嘅就係蓮苑臺瀑布同小夏威夷瀑布啦！據說上游曾經係麵粉廠，當時佢哋築起儲水池，以供應淡水，後來經過修復，成為小夏威夷游泳場，直到依家拆去泳池就成為咗小瀑布。其實由山腳出發，路程一啲都唔長，行大概15分鐘，就會去到蓮苑臺瀑布，呢條瀑布位於下游，所以瀑布嘅水集中，水流磅礡。至於再往上行15分鐘，就會去到中游嘅小夏威夷瀑布。
沙田：道風山
輕鬆指數：😎😎😎（5分為輕鬆無難度 ->1分為攰到嘔）
詳情：沙田十字架打卡朝聖 道風山基督教叢林
香港有唔少山峰都係佛道二教嘅根據地，但原來喺沙田就有一座基督教嘅名山：道風山！道風山基督教叢林以中國園林為建築特色，由沙田車站出發，大概45分鐘就可以上到道風山。園內嘅十字架絕對係道風山嘅地標，喺1930年由挪威傳教士艾香德牧師創辦，當時為咗吸引本地華人信奉，所以將大量中國式建築融入園區。道風山聖殿最多可容納70人，掛有由上海黃金記冶造嘅大撞鐘，上面刻有榮歸上帝同蓮花十架標誌。
元朗：河背水塘
輕鬆指數：😎😎😎😎（5分為輕鬆無難度 ->1分為攰到嘔）
詳情：港版嵐山竹林打卡 元朗秘景河背水塘
想有京都嵐山竹林feel，一於帶定相機，去河背水塘尋找港版日本風情畫啦！行山郊遊徑一開始出發嘅大斜路係全程所謂最辛苦嘅一段，大概20分鐘後就可以眺望元朗錦田平原一帶。當見到河背水塘燒烤場之後，就會有指示提醒往右邊嘅河背水塘方向行。河背水塘係香港面積最細嘅灌概水塘，水塘容量50萬立方米，水壩長157米，高17.4米，主要用途係灌溉新界西北嘅農田。河背水塘亦係香港少有嘅S形堤壩水塘，一邊係大壩，另一邊係水塘同小島，影出嚟嘅相好大對比，呃like一流！河背水塘之所以出名，就係因為家樂徑中段會途經一段竹林，猶如置身日本嵐山，影相打卡真係一流呀！
屯門：藍地水塘
輕鬆指數：😎😎（5分為輕鬆無難度 ->1分為攰到嘔）
詳情：屯門打卡郊遊好去處 必影彩虹欄杆同藍地水塘
位於屯門嘅藍地水塘行山郊遊徑就有彩虹欄杆同水塘兩大打卡熱點，絕對適合大家Weekend輕鬆走一回。不過，頭20-30分鐘都係上山嘅樓梯路線，好彩中途都有涼亭同長凳俾大家休息，唔算話太辛苦。行完長樓梯就會去到全長200米嘅彩虹欄杆，欄杆七彩繽紛，非常搶眼。彩虹欄杆尾段因為無樹遮擋，視野遼闊，屯門東至西都一覽無遺。再行多45分鐘同少量樓梯路，就會聽到流水嘅聲音，去到藍地灌溉水塘，呢條堤壩就係另一個影相打卡熱點。
長洲：北眺亭
輕鬆指數：😎😎😎（5分為輕鬆無難度 ->1分為攰到嘔）
詳情：港版鳥居函館夜景 長洲北眺亭郊遊遊
除咗竹林，想尋找港版日本風情畫，又點少得鳥居呢？呢條行山郊遊徑由長貴路出發，呢條係水泥平路，中途將會經過沙灘同公園，仲可以遠眺對岸嘅大嶼山芝麻灣半島。經過桂濤花園之後，轉入長北路，沿大斜路行上去，中途所有分叉路都唔理，大概行15分鐘，就會去到長洲食水配水庫旁邊公園，喺呢個公園就會睇到港版鳥居，嗱嗱臨影幾張相打卡啦！之後沿公園內嘅樓梯往上行，大概3分鐘，就會去到北眺亭，喺呢度可以眺望長洲全景。
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
