【A&M Diary】啟德機場曾經係世界上最繁忙嘅機場之一，甚至係全球最危險同最難降落嘅機場。隨住啟德機場關閉，機場跑道變成郵輪碼頭，嚟呢度除咗坐郵輪之外，仲有一個以啟德機場為主題嘅公園。weekend好去處就推介你哋嚟呢度野餐，而啟德跑道公園亦係寵物共享公園，一於帶埋毛孩嚟放電啦！
啟德跑道公園
公園位於跑道盡頭，並以舊啓德機場為主題。大家可以搭乘前往郵輪碼頭嘅公共交通工具，如果揸車嚟嘅，可以泊喺郵輪碼頭停車場，星期一至五每小時HK$10；星期六、日及公眾假期就每小時HK$15。
啟德歷史軸
啟德名稱嘅由來係取自何啟爵士同區德先生，機場由1925年1月24日作首次飛行，曾為全球客運量第三及貨運量第一嘅國際機場，直至1998年7月5日完成73年嘅任務。喺呢度就有唔少展板同圖片，記載啟德機場嘅興建至搬遷歷史。
一三跑道
喺啟德跑道公園嘅盡頭，就會見到地下寫住「1 3」，因為昔日嘅跑道角度係136度或316度，所以就被命名為「一三跑道」或「三一跑道」。喺跑道兩旁仲有紙飛機形狀嘅凳，影相打卡都好靚㗎！
野餐區
啟德跑道公園內有一塊約1.5公頃嘅大草地，旁邊係觀塘避風塘，前面就係無敵海景，環境舒適，大家可以帶埋野餐墊或帳幕，預備少少嘢食就可以喺大草地野餐啦！加上呢度係寵物共享公園，可以帶埋你嘅毛孩一齊放電放空，享受悠閒嘅假期。園內嘅基本設施有男、女、傷殘人士洗手間同汽水機；另外，場內都有好多垃圾桶，野餐完之後，記住保持地方清潔呀。
捷流41
以航空為主題嘅公園，又點少得飛機呢？呢度就展出政府飛行服務隊退役嘅捷流41定翼飛機。呢架飛機由1999年2月至2016年3月服役17年，曾經喺本港同境外執行搜救、反罪惡同氣象監測任務。雖然冇得入內參觀，但喺出面影相打卡都唔錯。
同場加遊：啟德郵輪碼頭公園
喺啟德郵輪碼頭除咗有少量商店同餐廳，天台就係啟德郵輪碼頭公園，但呢個公園並非寵物友善公園，如寵主進入郵輪碼頭，需要將寵物放入袋或籠內。不過，呢個公園冇乜特別，所以嚟開嘅可以順便行吓，但如果為咗呢個公園嘅，就冇特別需要啦！
